CONSULTA

Consulta publico tocante ley y maneho

Klik hier voor de Nederlandstalige versie van de consultaties.

Riba e pagina aki Ministerio di Transporte, Integridad, Naturalesa y Asunto di Adulto Mayor, ta consulta cu pueblo riba conceptonan di ley y di maneho. Di e forma aki, Gobierno ta duna pueblo e oportunidad pa haya conocemento di conceptonan legislativo y di maneho, y e posibilidad pa participa den loke lo bira e productonan final, stimulando transparencia y un democracia mas participativo.

Landsverordering Dierenwelzijn

Periodo di consulta: 18 september 2024 te cu 27 september 2024

E legislacion proponi na Aruba, e "Landsverordening dierenwelzijn", ta di gran importancia pa mehora e bienestar di animalnan riba e isla. E ley aki ta reconoce e balor intrinseco di animalnan y ta establece reglanan cla pa proteha nan salud y bienestar. Door di introduci medidanan contra maltrato di animal, negligencia, y e criamento descontrola di animalnan, e ley aki ta contribui na un bida mas sigur y saludabel pa animalnan. Esaki no ta solamente crucial pa e animalnan mes, pero tambe pa e salud publico y e calidad di bida na Aruba.

Ademas, e "Landsverordening dierenwelzijn" ta ofrece un cuadro pa e trato responsabel cu mascota y otro animalnan na Aruba. E ta pone exigencianan riba e cuido, alimentacion, y vivienda di animalnan, y ta impone sancionnan pa esnan cu ta viola e reglanan aki. E ley aki ta un paso importante padilanti den crea un cultura di respet y cuido pa animalnan, cu riba termino largo tambe lo fortalece e normanan y balornan social den nos comunidad. Door di ancra bienestar di animal legalmente, Aruba ta compromete su mes na un sociedad mas husto y amigabel pa animalnan.

DISCLAIMER

Let op: Esaki ta un concepto di ley y ainda ta den e fase di diseño. Consulta publico ta pesey di gran importancia y crucial pa sigura cu e ley ta bon funda y carga pa un gran parti di comunidad. Bo input y feedback ta yuda pa realisa un legislacion solido y efectivo pa bienestar di animal na Aruba. Uza e formulario oficial pa manda bo feedback.

Documento:

Klik e boton "FORMULARIO DI CONSULTA" akibou pa duna bo feedback. Reaccionnan por wordo publica anonimamente riba Publico.aw, cu consentimento di esun cu ta reacciona. Sin bo consentimento bo reaccion no lo wordo publica, cu excepcion di e responsabilidad di Gobierno a base di ley y veredicto di hues.

Reconocemento di derecho di naturalesa den Constitucion di Aruba

Periodo di consulta: 14 maart 2024 te cu 21 april 2024

E proposicion di ley aki ta trata di reconocemento di dos derecho fundamental cu ta conecta na otro, den Constitucion di Aruba:

E derecho di hende pa por biba den un ambiente limpi, saludabel y sostenibel;
E derecho di naturalesa, tanto na tera como na awa, riba proteccion, conservacion y restoracion di su ecosistema y biodiversidad, y pa regenera su ciclo di bida, structura y funcion.

Tocante e concepto di ley pa reconoce derecho di naturalesa

Hopi ta considera naturalesa como un comodidad. Hende ta asumi pa nan mes e derecho pa usa naturalesa pa beneficio propio. Naturalesa existente ta wordo adapta por medio di accion humano te na e punto cu e ecosistema no por sigui funciona debidamente. Esaki mientras nos propio existencia y bienestar ta inseparabelmente conecta na e existencia y bienestar di naturalesa. Tambe pa nos economia, naturalesa ta hopi importante. Economia di Aruba ta hopi dependiente di turismo, cu na su turno ta hopi dependiente di naturalesa.

E concepto di ley adhunto tin como meta pa reconoce dos derecho fundamental, cu ta conecta na otro, den Constitucion di Aruba, cu ta e derecho di hende pa por biba den un ambiente limpi, saludabel y sostenibel, y e derecho di naturalesa, tanto na tera como na awa, riba proteccion, conservacion y restoracion di su ecosistema y biodiversidad, y pa regenera su ciclo di bida, structura y funcion. Reconociendo derecho di naturalesa, Aruba por manda un mensahe cla cu naturalesa no ta un obheto pa wordo usa sin mas, pero un suheto cu derecho. Esaki ta percura pa un base fuerte pa e instrumentonan legal nesesario pa proteha naturalesa.

Documento: